Lekin muhabbat ka saara jahaan dikhta hai,
Har charind parind ka apna he ek andaaz dikhta hai,
Woh qudrat jis ko ooper waley ne bari hi muhabbat se banaya hai,
Uss muhabbat k aqs main apney ghar ki chat se thoraa sa aasmaan dikhta hai.
Aur yoo'n nazar parti hai ik uqaab par meri,
Bohut buland jis ki parwaaz hai,
Bohut ooncha jis ko rab ne nawaza hai.
Aus yoo'n iss dil-e-nadaan main ik khayaal dorta hai,
Uss uqaab se mukhatib honay ka ji karta hai,
K ae uqaab! Kya tu mujhey sun sakta hai?
Itni oonchaai se mujh zameen wali ko dekh sakta hai?
Hawa k jhonkon main tera ajab khel,
Teray parro'n main hawaon ki sarsarahat,
Teray naazuk jism ki woh khoobsurat sakht,
Aur uss k saath gharv se phelaye huey teray par,
Yeh sab main dekh sakti hun, sun sakti hun, mehsoos kar sakti hun...
Ae Khuda, ye tu ne kya namoona bana dala hai,
Ik uqaab ko aasmaan ki bulandiyon main urna sikha dala hai.
Muhabbat ka mara hua kabhi idhar kabhi udhar woh magan hai,
Shayad tu ne ussey hum se behtar andaaz-e-muhabbat sikha dala hai.
Tabhi main ussey zameen se dekh sakti hun,
Uss ki khush qismati pe rashq kar sakti hun,
K tu ne shayad ussey muhabbat he karna sikhaya hai.
Tabhi meri pukaar sun kar bhi woh nahin sunta,
Meri bad-qismati par shayad ussey afsos hai,
Ya phir ye tera hi ik dastoor hai.
Main jissey tu ne ghor-o-fikr ka tohfa de rakha hai,
Do raastey dikha rakhey hain,
Ik imtehaan main daal rakha hai.
Ae uqaab! Shayad k tu sun sakey meri pukar,
K zameen par se tujhey koi dekh raha hai,
Teri khoobsoorti, teri khush-qismati par rashk kar raha hai,
Tu jissey khuda ney muhabbat, sirf muhabbat hi karna sikha rakha hai...
9/16/2012
No comments:
Post a Comment